Համազգային Հայ Կրթական եւ Մշակութային Միութեան առաքելութիւնն է սատարել եւ տարածել հայ կրթութիւնը եւ մշակոյթը։ Շուրջ 1 դար է, որ Համազգայինը իր այս նպատակին հաւատարիմ, կը շարունակէ իր աշխատանքները այս մարզերուն մէջ։
Անդրադառնալով միայն կրթական ճիւղի հիմնական կէտերուն, Համազգայինը հիմնած է եւ կը գլխաւորէ 3 Ճեմարաններ՝ Պէյրութի, Մարսէյի եւ Սիտնիի մէջ, մէկ ամէնօրեայ վարժարան՝ Փարիզի մէջ, եւ Արեւմտեան Սփիւռքի ու Մոսկուայի մէջ բազմաթիւ միօրեայ վարժարաններ, Արցախի մանկուկներու դաստիարակչական ծրագիրները, ինչպէս նաեւ՝ Հալէպի Հայագիտական Հիմնարկը։ Այս կրթօճախները հայեցի կրթութիւն եւ դաստիարակութիւն կը ջամբեն հարիւրաւոր մանուկներու, պատանիներու եւ երիտասարդներու։
Հայերէնի վկայեալ ուսուցիչներ պատրաստելու մղումով, աւելի քան տասը տարի է հաստատուած է կրթաթոշակի տրամադրում հայ ուսանողներուն, որոնք նախ իրենց բնակած երկրի, ապա Երեւանի Պետական Համալսարանի մէջ փափաքը ունին մասնագիտանալու հայերէն լեզուի եւ գրականութեան ու պատմութեան ճիւղերուն մէջ եւ մագիստրոսի տիտղոսով աւարտելէ ետք, կրնան ծառայել այս կարեւոր մարզին մէջ։
Համազգայինի Կեդրոնական Վարչութիւնը նաեւ գործադրութեան դրաւ Մանկապարտէզի երեք տարիներու, ինչպէս նաեւ Միջնակարգի Հայոց Պատմութեան նոր դասագիրքերու ամբողջական հրատարակութեան ծրագիրը, ինչպէս նաեւ՝ տասնեակներով այլ գիրքերու հրատարակումը։ Հայ գիրքը հասանելի դարձնելու համար բոլորին, Համազգայինի Հրատարակչատունը հաստատած է Ե-Գրադարան։
Հայերէն լեզուն հաճելի ձեւով ուսուցանելու աշխատանքներու ծիրէն ներս, 10 տարիէ ի վեր հաստատուած է մանկավարժական արդիական ծրագիրներու բաժանմունքը, որ կը պատրաստէ զանազան ուսուցողական խաղեր ելեկտրոնային գործիքներու վրայ, ինչպէս նաեւ՝ ուսուցողական խաղալիկներ ու մանկական հրատարակութիւններ։
Ծրագրման վերջին փուլերուն մէջ կը գտնուին կրթական այլ աշխատանքներ, որոնց մեկնարկը կը յայտարարուի շուտով։
Համազգայինը միշտ ջանացած է սեփական միջոցներով իրականացնել իր կրթական եւ մշակութային գործունէութիւնը եւ հազուադէպօրէն դիմած է աշխարհացրիւ հայ համայնքներու նիւթական օժանադակութեան։ Սակայն, բոլորիս քաջ յայտնի աշխարհաքաղաքական ներկայ պայմանները լուրջ եւ բացասական անդրադարձ ունեցած են Կեդրոնական Վարչութեան նիւթական միջոցներուն վրայ։ Ուստի, կը դիմենք մեր գիտակից հայրենակիցներուն, որոնք պատրաստ են իրենց նիւթական ներդրումով սատարել մեր աշխատանքներուն։
Նորագոյն նուիրատուութիւններ
